Bargobihttá: Fuomášuhttit ohppiide dihto giellaáššiid:
Vállje áigodaga go áiggut bargat guhtege giellaáššiin. Čilge vuos ohppiide dán giellaášši hástalusa. Ráhkadehket plakáhta dan áššis. Dasto fuomášuhte ja deattut dán beaivválaš ságastallamis. Dá leat muhtun ovdamearkkat maiguin sáhttá bargat:
- Guvttiidlogu geavaheapmi. Čuolbma lea ahte guvttiidlogu geavaheami sajis mánát sáhttet geavahit máŋggaidlogu, nugo dárogielas, eaŋgalasgielas, suomagielas. Deattut guvttiidlogu čilgedettiin ja ane liibba atnit dáid hámiid. Omd. dudnos orru buorre beaivi otne! Moai rektoriin letne humadan. Gillebeahtti go doai...
- Akkusatiiva/genitiiva hápmi loguid dadjamis. Čuolbma lea ahte oahppit bidjet loguid maŋŋái subjeavtta nominatiiva máŋggaidlohkui, nugo vierrogielain. Sámegielas bidjat objeavtta akkusatiiva/genitiiva hápmái. Dadjet omd. Mus leat golbma spáppat. Riekta lea: Mus leat golbma spáppa.
- Postposišuvnna haga geavaheapmi. Čuolbma lea ahte sátni haga adno ovddabealde objeavtta, go galggašii maŋábealde. Fuomášuhte ahte sámegielas eai leat nu galle preposišuvnna, ja eanas postposišuvnnat. - Mánná manai gahpira haga olggos, bárdni manai hárjehallamii spáppa haga.
- Imperatiivva hámit. Čuolbma lea ahte indikatiiva hápmi adno go galggaše imperatiiva hámi geavahit.
Ovdamearkka dihte jus muhtun áigu čurvet: Bohtet deike! De baicca čurve: Boahtibehtet deike!
Galggalii hárjehallet rievttes imperatiiva hámiid, nugo dáin vearbbain maid dávjá soaitá dadjat imperatiiva hámis: Boahtit, mannat, gárvodit, čállit, lohkat.